أخبار عاجلهأسرة الأهليميديا الأهلي

اقراء ماذا قال الخطيب فى كلمتة منذ قليل بمناسبة 111سنة على ميلاد الاهلى

الكابتن محمود الخطيب رئيس النادي الموجود في رحلة علاج بالإمارات وجه كلمة لجمهور الأهلي بمناسبة مرور 111سنة على إنشاء النادي.. جاء فيها:
بسم الله الرحمن الرحيم،
جمهور مصر العظيم،
جمهور الأهلي الوفي،

زي النهاردة من111 سنة.. اتأسس النادي الأهلي العظيم.

«زي النهاردة .. بنينا على أرض مصر هرما رابعا .. وكتب رموز النادي الأوائل أول صفحة في تاريخ كبير جدا عظيم جدا.. بيزيد كل يوم وبيكبر كل لحظة.. زي النهاردة يوم 24 أبريل سنة 1907 فتح الأهلي بابه لمجد عايش معاه وعايش بيه وملازمه.. زي النهاردة ابتدينا حلم بقى في كل بيت والأهم في صدور أولاده ومحبيه المخلصين».

«يوم 24أبريل مش يوم عادي في تاريخ الأهلي .. لأنه كمان اللي اجتمعوا في اليوم ده مش عاديين؛ ولأن الكيان اللي أصبح حقيقة بعدها مش عادي.. في اليوم ده وضع عظماء الأهلي.. الزعيم مصطفى كامل ، والزعيم طلعت حرب، وأمين باشا سامي وعمر بك لطفي، وقبلهم الزعيم الوطني الكبير سعد زغلول، وضعوا الأساس لكيان تفخر بيه مصر كلها والوطن العربي والعالم.. الكيان ده مكمل بولاده وأعضائه وجمهوره.. الكل في حلقة.. في سلسلة من العطاء وإنكار الذات علشان يفضل الأهلي الحاجة اللي بتجمعنا كلنا واللي بنفخر بيها كلنا».

«زي النهاردة بدأت الحكاية، وكل يوم .. جيل بيسلم الراية.. راية العزة والفخر والأمجاد اللي بترافق مسيرة أعظم نادي.. النادي العظيم بمبادئه قبل ما يكون عظيم ببطولاته.. النادي اللي مؤمن إن جمهوره وأعضاءه ومحبيه ولعيبته هم البطولة الأهم .. لأنه مؤمن أن البطولات من صنع أبناء الأهلي.. الرجال والسيدات».

«كنت أتمنى أكون بينكم النهاردة علشان نحتفل مع بعض بالمناسبة دي، لكن قدر الله وما شاء فعل، وأطمئنكم إني بفضل الله بخير، وأنا ممتن جداً لمشاعركم اللي غمرتموني بيها طول الفترة اللي فاتت واللي منحتني أمل كان أقوى من الألم، وإن شاء الله قريب جداً هنكون مع بعض ونحتفل بعيد الأهلي وببطولة الدوري الأربعين وببطولات كتير حققها أبطال الأهلي في كل اللعبات الرياضية».

«قريّب إن شاء الله هنكون مع بعض، واحنا بنحتفل سوا.. لازم كمان نفكر في بكرة.. لأن شعارنا دايما هو «تاريخ.. مبادئ.. تطوير».. كلنا مع بعض حنبني الأهلي سوا .. وحنفذ برنامج عائلة الأهلي سوا .. وحنحافظ على هذا الكيان العظيم اللي مطلوب دايما إنه يكون في المقدمة لأن دا قدره ودا طريقه اللي مش ممكن يحيد عنه أبداً .. طريق الانتصارات والبطولات، والتاريخ اللي بيصنعه كل يوم».

«طوال الفترة اللي فاتت الأهلي ما غابش عني لحظة واحدة .. مش باتكلم بس عن الأمور الإدارية ومتابعتها كل يوم لكن عن الأهلي البيت والأسرة والحالة اللي بترافقنا في كل الظروف وبفضل الله وبيها بنقوى على الظروف ..  

الحمد لله انك بتنتمى لهذا الكيان الذى يعيش بداخلك ويعطى لك طاقة فوق الوصف الطاقة هى سر الاهلى سر المحبة الكبيرة التى صنعها الاهلى فى 111سنة جعلت منه نادى اكبر من حبنا له او تشجعينا له .

أود أن أقول لجمهور مصر العظيم وجمهور الاهلى الوفى كل سنة وانتم طيبين كل سنة وانتم حراسهوصوته وفرحته وبقول لكل رموز الاهلى وادارته على مر السنين شكرا ليكم كلكم على ما قدمتموه لبيتكم التاريخ مش ممكن ينسى اللى قدمتموه على مر السنين الطويلة التى مضت فكل من قدم ولو جزء بسيط جدا ساهم فى بناء الكيان الكبير الذى يجمعنا كلنا .

وبقول لنجومه فى كل الالعاب رجال وسيدات  كل سنة وانتم على منصة التتويج تكتبو اسم الاهلى للاهلى ولكم الاهلى اللى يستاهل كل نقطة عرق مننا .

وكمان بقول لكل اعضاء النادى الاهلى كل سنة وانتم متجمعين على حب الاهلى اللى بيفخر بيكم وانتم بتكتبو وتساهمو فى هذا التاريخ الاهلى الذى يفخر بيكم زى ما انتم تفخرون به

.كل سنة ومصر بخير ويا رب كل ايامنا اللى جاية تكون اعياد باذن الله كل سنة والاهلى بخير كل سنة واحنا مع بعض مجمعين فى حب مصر بيتنا الكبير  وحب الاهلى الذى سوف  يبقى للجميع و فوق الجميع

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Shortlink:

للاشتراك في google play

الأهلي فاميلي

مجانى
عرض